Këngëtarja e njohur kosovare prej kohësh po pret të shohë albumin me këngë të zgjedhura që i është premtuar pesë vjet të shkuara. Deri tani ende nuk ka përfunduar, ndërsa këngëtarja thotë se nuk ka kohë të presë

Pesë vjet të shkuara, njërës nga këngëtareve në të njohura kosovare, Nexhmije Pagarushës, iu premtua se do t’i realizohej albumi me këngët që kanë lënë gjurmë në historinë e muzikës shqiptare. Bilbili i Kosovës, Nexhmije Pagarusha, ka pak shpresë se kjo ëndërr së shpejti do të bëhet realitet. Ministria e Kulturës ka ndërruar pesë ministra që nga kjo deklaratë.

“Ata nuk e dinë që çdo orë për mua është shumë”, ka thënë Pagarusha për gazetën kosovare “Koha Ditore”. Me gjithë premtimin e Ministrisë së Kulturës se projekti “Nexhmije Pagarusha - Artiste e Popullit” do të finalizohej në fund të vitit të kaluar, duket se nuk është bërë gjë. Një ditë xhirimesh për videoklipin e këngës “Baresha”, është hapi i vetëm që është bërë deri më tani. Përveç këtij videoklipi dhe albumit, i cili është i pari në karrierën e këngëtares së njohur, sipas projektit janë parashikuar edhe një DVD, një dokumentar dhe një monografi.

“Para një muaji është xhiruar një pjesë e videoklipit të këngës ‘Baresha’ në Hamamin e Prizrenit, por nuk e di çfarë ka ndodhur më, sepse askush nuk më ka lajmëruar”, ka thënë Pagarusha. “Jam e lënduar, sepse nuk di si shkojnë këto punë, por unë nuk kam kohë të pres”, ka shtuar ajo. Nga ana tjetër, Shasivar Haxhijaj, këshilltar i lartë politik i ministrit të Kulturës së Kosovës, Memli Krasniqi, ka thënë se projekti për veprimtarinë e Nexhmije Pagarushës do të realizohet në kuadër të nismës së MKRS-së për digjitalizim të materialit zanor. Nexhmije Pagarusha në 77-vjetorin e lindjes, vitin e kaluar, nga Presidenti i atëhershëm i Kosovës, Fatmir Sejdiu, është dekoruar me medaljen “Artiste e Merituar”.