Në Policinë e Kosovës hynë 16 policët e parë të MUP-it

    Diese Seite verwendet Cookies. Durch die Nutzung unserer Seite erklären Sie sich damit einverstanden, dass wir Cookies setzen. Weitere Informationen

    Përkthyes

    Radio Projekt 21

    Ndegjo me Internet Explorer

    Ndegjo me Firefox

    Forumsstruktur

    Team

    • Në Policinë e Kosovës hynë 16 policët e parë të MUP-it

      [IMG:http://img5.fotos-hochladen.net/uploads/largeapoliciap0q32ylnwk.jpg]



      Kontingjenti prej mbi 300 pjesëtarëve të MUP-it serb po inkuadrohen në Policinë e Kosovës. Të parët kanë nisur dje kur 16 policë të MUP-it u bënë pjesëtarë të Policisë së Kosovës. Qeveria e Kosovës edhe në ditën e parë të inkuadrimit të këtyre pjesëtarëve, dje nuk ka dhënë detaje , ndër më të zakonshmet, që kanë të bëjnë me përdorimin e simboleve të Kosovës, tabelat e veturave, kontratat e punës (pagat), nënshtetësinë.
      Megjithëkëtë 16 zyrtarë policorë serbë prej dje janë pjesëtarë të Policisë së Kosovës. Siç u tha, janë verifikuar nga Agjencia e Regjistrimit Civil të MPB-së, Policia e Kosovës dhe ajo e EULEX-it, para se të bëhet inkuadrimi, por jo dhe nga AKI-ja për të kaluar apo jo testin e sigurisë.

      Komisioni parlamentar për Mbikëqyrjen e AKI-së dhe ai për Punë të Brendshme, Siguri dhe Mbikëqyrjen e FSK-së, nuk janë të njoftuar me detajet rreth procesit të integrimit të pjesëtarëve serbë në Policinë e Kosovës. Ekspertët e sigurisë paralajmërojnë rrezik për zinxhirin komandues të policisë dhe kushtetutën e vendit nëse nuk aplikohen kriteret e njëjta të seleksionimit sikur ka ndodhur deri më tash me përzgjedhjen e kandidatëve për policë.

      Ministria e Punëve të Brendshme, të premten ka njoftuar se ka filluar integrimi i ish-pjesëtarëve të MUP-it në Policinë e Kosovës.

      “Në Drejtorinë Rajonale të Policisë së Kosovës, në pjesën veriore të Mitrovicës, ka filluar zyrtarisht integrimi i ish- pjesëtareve të MUP-it në Policinë e Kosovës. Janë nënshkruar kontratat e punës me 16 zyrtarë policorë si dhe është nënshkruar Deklarata e betimit në përputhje me parimet dhe procedurat e Policisë së Kosovës”, thuhet në njoftimin e MPB-së. Aty thuhet se nënshkrimit të kontratës së punës i ka paraprirë procesi i verifikimit të identitetit të tyre nga ana e Agjencisë së Regjistrimit Civil të MPB-së dhe verifikimit të së kaluarës së tyre nga ana e PK-së dhe EULEX-it.

      Ish- pjesëtarët e MUP-it trajnohen në Vushtrri

      “Pas nënshkrimit të kontratave të punës, zyrtarët e rinj të Policisë së Kosovës, nga e hëna, më 16 dhjetor 2013, do të fillojnë trajnimin në Akademinë e Kosovës për Siguri Publike në Vushtrri për t’u pajisur me njohuri lidhur me legjislacionin e Republikës së Kosovës, organizimin e brendshëm të PK-së, parimet dhe procedurat...”, ka bërë të ditur MPB-ja, edhe pse zyrtarë të saj të kontaktuar nga gazeta nuk janë përgjigjur për detaje shtesë.

      Policia e Kosovës ka konfirmuar se pjesëtarët serbë do të inkuadrohen në polici pasi të kalojnë kriteret e njëjta me ata të pjesëtarëve shumicë dhe komuniteteve tjera.

      Baki Kelani zëdhënës i Policisë së Kosovës, ka thënë për gazetën se të gjithë të punësuarit e uniformuar në Policinë e Kosovës, si dhe të gjithë ata që mund të punësohen në polici duhet t’i respektojnë dhe aplikojnë Ligjet e aplikueshme në Kosovë. ”Të gjitha Udhëzimet Administrative dhe Procedurat e Brendshme Policore duke përfshirë edhe ato financiare janë të njëjta për të gjithë punonjësit e Policisë se Kosovës varësisht prej pozitës apo gradës të cilën e posedoni, konform sistemit të pagave që aplikohen”, thotë ai.

      Anëtarët e Komisionit për Punë të Brendshme, Siguri dhe Mbikëqyrjen e FSK-së kanë thënë se nuk janë të informuar për detaje sa i përket procesit të integrimit.

      Anton Quni anëtar i këtij Komisioni nga LDK-ja ka thënë se detajet teknike sesi do të realizohet integrimi i ish pjesëtarëve të Ministrisë së Punëve të Brendshme të Serbisë, në kuadër të Policisë së Kosovës ende nuk i kanë. Ai ka shprehur insistimin që të gjithë ata pjesëtarë të policisë që vijnë nga MUP-i të kenë të gjitha shenjat dalluese, benificionet dhe të gjitha të drejtat me kolegët e tyre shqiptarë dhe se çfarëdo dallimi i vogël do të cenojë jo vetëm zinxhirin komandues, por dhe sigurinë në atë pjesë të Kosovës.

      Burim Ramadani, nga Komisioni për Mbikëqyrjen e AKI-së ka thënë se nuk ka diçka të veçantë e cila do të shtyjë të mendojë se ky proces është i rrezikshëm apo që nuk do të duhej të ndodhte, porse i tërë procesi është një sfidë e nivelit të lartë. Sipas tij “vështirësitë që mund të shfaqen gjatë procesit duhet trajtuar seriozisht, profesionalisht dhe politikisht, në mënyrë që ato të shmangen” dhe se çështja e të kaluarës së ish-pjesëtarëve të MUP-it është ndër çështjet më sfiduese dhe për këtë besoj se duhet të ketë syçelësi të madhe.

      Ganimete Musliu, anëtare e komisionit parlamentar për siguri nga PDK-ja e ka quajtur marrëveshjen e arritur në Bruksel për integrimin e pjesëtarëve të MUP-it serb një të arritur të mirë, pasi sipas saj, në këtë mënyrë përfundimisht arrihet shpërbërja e strukturave dhe veprimeve ilegale në veri. Ajo ka theksuar se çdo mospërfillje e procedurave dhe ligjeve të Kosovës është mosrespektim i marrëveshjeve të arritura në Bruksel dhe nëse një gjë e tillë ndodh marrëveshja është e shfuqizuar. Ajo beson se kriteret do të jenë të njëjta sikurse për të gjithë policët në Republikën e Kosovës, dhe përzgjedhja do të bëhet në bazë të ligjeve ekzistuese.

      Përfshirja e MUP-it, vendim politik

      Florian Qehaja, drejtor ekzekutiv i Qendrës Kosovare për Studime të Sigurisë ka thënë se përfshirja e pjesëtarëve të MUP-it në kuadër të Policisë së Kosovës është një vendim politik. “Nuk përbën ndonjë risi fakti që formacione të caktuara që kanë luftuar kundër sistemit (në këtë rast këta kundër Kosovës) të jenë integruar më vonë në institucione legjitime. Janë brengosëse modalitetet e përfshirjes së tyre. Nuk dihet saktë nëse do të jetë verifikimi i sigurisë i bërë nga institucionet vendore (në këtë rast AKI) definitiv në përzgjedhjen e këtyre policëve”, thotë ai duke qenë skeptik lidhur me aplikimin e kritereve.
      “Kriteret duhet të jenë të njëjta me ato të policëve tjerë; të inkorporohen pjesëtarët e moshës së re, pastaj kriteret profesionale e shkollore”,thotë ai.

      Eksperti tjetër i sigurisë Avni Islami ka thënë se integrimi i pjesëtarëve të MPU-it në Policinë e Kosovës është hap i gabuar. “Ky veprim është akt politik dhe si i tillë është i prirë për të dështuar. Pjesëtarët të cilët do të “integrohen” në policinë e Kosovës do të jenë një sfidë dhe problem shumë i madh jo vetëm për policinë, por edhe në tërësi për mekanizmat e sigurisë.Ky grup i MUP-it do të sjellë pa dyshim implikime të dëmshme, sepse këta asnjëherë nuk do ta ndjejnë vetën policë të Republikës së Kosovës”, thotë Islami.

      Sipas tij, këta pjesëtarë edhe pse do ta bartin uniformën e policisë kurrë nuk do të veprojnë në një komandë apo hierarki, por do të veprojnë ndaras. Ai ka mohuar se procedurat ligjore që aplikohen për pranimin dhe verifikimin e regrutëve të rinj për policë të Kosovës, aplikohen dhe për pjesëtarë të MUP-it.